|
Mei te mea e te manamanata nei te akaaere o te Tua Patoi ko Tom Marsters mei tana i akakite e kua ariki te Tauturu Parai Minita ko Sir Terepai Maoate i tetai okotai tauatini mataiti note keri mai i te manganese i roto i te pae moana o te Kuki Airani nei, e kia tutaki ua ia mai e $50 mirioni okotai taime ua, te akapapu nei te Kumiti o te Manganese e kare teia i te tuatua tika.
Te akamarama nei te akatere-au o te Kumiti ko Terepai Maoate - meangiti e kare e tikaanga i ariki ia ake no tetai uatu putuputuanga i te rave i teia angaanga.
Te akakite katoa nei aia kia oti rava tetai au akapapaanga tuatua e te ture i te paruru i te Kuki Airani kia kore ratou e ruti i te au meitaki ka rauka mai no teia akakoroanga, i reira e akarakara meitaki ia ai e ko ai te putuputuanga meitaki rava atu tana au tamanakoanga.
Te aru nei ratou i na Maoate ei i te au akamatakite anga a te International Finance Corporation, auraka kia viviki i te ariki i tetai uatu kia rave i teia angaanga mate kore e paruru i te iti-tangata aete Basileia.
I tupu mai teia manamanata i muri ake i tetai kamupani Kanata e inangaro nei e kia rauka tetai raitini nona ua ki tetai tuanga o te pae moana Kuki Airani no te keri mai i te manganese.
I mua ana kua akakite rai a Marsters e te arai nei te Tauturu Parai Minita i teia kamupani Kanata ko te Endeavour i te keri mai i te manganese e tetai $300 mirioni te ka rauka mai i te mataiti okotai.
Te akapapu akaou nei te akatere-au ote Kumiti, ka aru ratou i te au akamatakiteanga a te IFC e kare katoa e tikaanga i oronga ia ake ki tetai uatu note keri i te manganese i roto i te pae moana o te Kuki Airani nei.
Tataia: Govmedia |
